درودِ ابراہیمی وہ درود ہے جو ہر نماز میں تشہد کے بعد پڑھا جاتا ہے۔ صحابہ کرام رضی اللہ عنہم نے حضور ﷺ سے پوچھا کہ آپ پر درود کس طرح بھیجیں، تو آپ ﷺ نے خود یہ کلمات سکھائے۔
عربی متن
اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ، اللَّهُمَّ بَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ
حوالہ: صحیح بخاری، کتاب احادیث الانبیاء، حدیث: ۳۳۷۰ (راوی: حضرت کعب بن عجرہ رضی اللہ عنہ)
اردو ترجمہ
اے اللہ! محمد (ﷺ) اور آلِ محمد پر رحمت نازل فرما، جس طرح تو نے ابراہیم (علیہ السلام) اور آلِ ابراہیم پر رحمت نازل فرمائی؛ بے شک تو قابلِ تعریف، بڑی شان والا ہے۔ اے اللہ! محمد (ﷺ) اور آلِ محمد پر برکت نازل فرما، جس طرح تو نے ابراہیم (علیہ السلام) اور آلِ ابراہیم پر برکت نازل فرمائی؛ بے شک تو قابلِ تعریف، بڑی شان والا ہے۔
دلیل
اللہ تعالیٰ نے خود درود کا حکم دیا ہے: ﴿إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾ بے شک اللہ اور اس کے فرشتے نبی پر درود بھیجتے ہیں؛ اے ایمان والو! تم بھی آپ پر درود بھیجو اور خوب سلام بھیجو۔
حوالہ: سورۃ الاحزاب، آیت: ۵۶
فضیلت
حضور ﷺ نے فرمایا: جو مجھ پر ایک مرتبہ درود بھیجتا ہے، اللہ تعالیٰ اس پر دس مرتبہ رحمت بھیجتا ہے۔
حوالہ: صحیح مسلم، کتاب الصلاۃ، باب الصلاۃ علی النبی ﷺ بعد التشہد، حدیث: ۴۰۸
اور حضرت انس رضی اللہ عنہ کی روایت میں اس کے ساتھ دس گناہوں کی معافی اور دس درجوں کی بلندی بھی آئی ہے۔
حوالہ: سنن النسائی، کتاب السہو، حدیث: ۱۲۹۷
زیرِ نگرانی: مفتی محمد طاہر رضا قادری